MƏMMƏD MƏMMƏDLİ

İl başa çatır, həm də özü ilə maraqlı anları aparır. Bəs 2023-cü ilin yaddaqalan fotoları hansılardır? Ən yaxşılar arasında İtaliyada vulkanın püskürməsi, səhrada yaranan tıxac və kosmik fəzada üzən meduzanın fotoları da var. Bunların hamısını zövqlü bir şəkildə lentə almaq isə fotoqrafdan xüsusi bacarıq tələb edir. Gəlin birlikdə izləyək…

Rio Qrande çayı, Meksika

İlk baxışdan qorxulu görsənsə də uşaq üçün sevincli andır. Göyə atılan uşaq onu sevən valideynlərin qucağına düşməsini gözləyir. Ancaq əslində bu, o qədər də xoş görüntü deyil. Martın 29-da çəkilən fotoda Meksika sərhədini qanunsuz keçən bir qrup immiqrantın azyaşlı uşağı Rio Qrande çayının üzərindən keçirməsi anı təsvir olunub.

Reykyanes yarımadası, İslandiya.

Yerli sakinlərin öz smartfonları ilə bozaran buludları qeydə alması maraqlı görünür. Onların qırmızı fonda cızılan silueti başqa ulduzdan gələn yadplanetlilərə bənzəyir.

Dumanlı fəzada üzən meduza

Bu ilin iyulunda NASA Yerə ən yaxın ərazidə yerləşən ulduz qrupunun şəklini yayıb. Şəkildəki kosmik duman fəzada üzən nəhəng bir meduzanı xatırladır. Görüntünü kainatda infraqırmızı dalğada tədqiqatlar aparan “James Webb” teleskopu qeydə alıb.

Poseydon məbədi, Yunanıstan

Bu ilin iyulunda çəkilən daha bir şəkil Poseydon məbədinin təsviridir. Fonda nəhəng ayın qalxması bütün Yunanıstanı heyrətləndirdi. Belə ki, “Dəniz allahı”nın şərəfinə ucaldılan məbəd sütünlarının qalıqları kəhrəba rəngində bərq vururdu.

“Black Rock” səhrası, Nevada ştatı, ABŞ

Şəkil bu yay Nevada ştatın “Black Rock” səhrasında “Yanan adam festivalı”ndan qalan bir xatirədir. Şəkildə istidən pörşələnən sürücülərin tıxacda ilişib qalması əks olunub. Tədbir zamanı yağış səhradakı yolu yaman günə qoyduğundan iştirakçılar maşınlarda qalıblar.

Qəzza

Qəzza şəhərində fələstinli qadının təyyarə hücumundan sonra sağ qalması hər kəsi heyrətləndirir. O, xarabalıqlar arasında olduqca sakit görünür.

Etna vulkanı, İtaliya

İtaliyanın Funivia meydanından çəkilən fotoda Etna vulkanının püskürməsi həkk olunub. Həmin gecə vulkandan ayrılan lava, alovlu tüstü səmanı al-qırmızı rəngə boyayıb.

Ukraynada dini məbəd

Rusiyanın hava hücumundan sonra dağıntıya məruz qalan bu dini məbəd Odessada yerləşir. Kilsə raket zərbəsindən sonra çəkilsə də şəkil özü-özlüyündə hər şeyi deyir.

“Durdle qapısı”, İngiltərə

Fotoqraf Cek Lodj zaman və məkanda öz yerini tapmaq üçün nə az-nə çox, 4 il vaxt sərf etdi. Nəhayət, İngiltərənin cənubundakı Lulvort sahillərində günəşin çıxma anını istədiyi rakursdan çəkə bildi. Doğrudan da günəşin 18 bucaqlı şəfəqlərini bir neçə saniyəlik “Durdle qapısı” kimi tanınan arkadan ətrafa saçması anını izləmək, sözün əsl mənasında zövqvericidir.